Thursday, May 14, 2015

Не ти простувам


Не ти простувам Тони.
Не ти простувам ни во името на деновите кога сум те сметала за величина од талент, и ми било чест што сум те запознала како позната фаца која дружи со татко ми по скопските еснафски кафани.

Не ти простувам, зошто ми го политизираш постот во кој те прозвав (и имав доблест да те пингам)

Не ти простувам зошто се срамам што сум ти давала стоечки овации, за да на еден обичен ФБ пост си дозволиш да се спуштиш толку ниско и од уста, место актерски алтани и пиеси да ти се ројат измети, стомачни гасови, полови органи и муви лајнарки.

Не ти простувам зошто го закопа талентираниот актер и дозволи на негово место луѓе без грам школо и 2 прочитани лектири, да постават своја креација на уличен плукач, за сопствени цели.

Не ти простувам зошто плукаш по нас воспитаните, кои растевме со твоите претстави и плачевме на твоите ликови, за да ги воздигнуваш до небеса оние кои безмилосно те трошат во дневно-политички цели.

Немам ништо против "public roast" (хумор со навреди), ама Тони (или кој и да си ти сега позади ликот на актерот), ти ја загуби секоја смисла за хумор.

Бесот ти го разбирам. Не би сакала да сум ти во кожа, кога после сè постигнато, вистинските фанови на културата ти се губат како трошки леб меѓу гулаби. Можеби не ја сфаќам (зошто никад нема да си ја дозволам) агонијата на тешко градење уметнички аворитет, а после неколку години пропагандно фијаско, сите да те паметат само по простачки речник упатен кон обичниот народ, и оние кои до вчера ти биле културни фанови.
И мене би ме болело ако до вчера плејада интелектуалци го ценеле моето творештво, а сè што имам денес се армија партиски војници кои не погледнале една од твоите претстави, а те величаат и аплаудираат само поради гнасните зборови упатени кон оние кои не се сложуваат со нивните политички гледишта.

Знам Тончи. Уствари не знам и не дај Боже да дознаам, ама мора да е ужасно тешко.
И можеби јас сум никој и ништо, но личноста и сликата за мене, која сум ја изградила, не сум ја погазила ниту поплукала со гнасен вокабулар.
Дотолку повеќе треба да те загрижува што тоа не си го дозволува дури ни некоја си таму никој и ништо блогерка која чкраба по интернет. Но моите 50k фанови на тој никој и ношто "Проклети да сте" блог, и после 2 години се враќаат, го читаат и плачат на него. Не зошто е посебен, туку зошто е искрен. Зошто не е напишан да им служи ни на едните ни на другите. Зошто зборовите во него носат душа, а не злоба.

Не ми простувај што Шанац го заменив со Шабац. Така ќе биде додека не се врати Тони од "Буре Барут" и "ММЕ". Не ми простувај, зошто јас не сум твојата публика од локал-патриотски претстави на политичари, кои се бават со паланечки рокенрол, кафански турбо-фолк и по налог врескаат "TONI TI SI TZAR". Вистинската твоја публика не те викаше TZAR, (така врескаат оние следачите на Аца Лукас), туку со почит те враќаше на бис како актерска величина.

Прости ми само што имам трпение и надеж дека ќе се врати актерот Тони, оној кој има сила да крене стотици на нозе во театар, не оној кој има плунка и вреќа пцости да повлече партиски шизофреници.
Се молам Тони Михајловски да го најде патот до излезот и да го затвори во мракот во кој досега беше втурнат, овој Шабац.

P.S." Ова не беше блог пост, но во чест на еден уметник кој Шабац неправедно го втурна во заборав ќе го ставам на блог и ќе се вика -Не ти простувам-. Затоа ти "кој и да си" позади ликот на Тони, не го кради насловот инспириран според ликот на уметникот Михајловски"

Збогум Тончи, ни недостасуваш


Линк до постот на Facebook овде

Friday, February 20, 2015

И гнидите се луѓе



Добро утро Тодоров,

Не сум доктор, ама денес ЗА ТЕБЕ ќе станам. Во твоја чест, под твоја ингеренција, само за тебе! Твој ало-докоторе. Можеш да ме викаш твоја пара-докторка.
Има многу востановени дијагнози и пореметувања на личноста, ама во оваа специјална прилика, САМО ЗА ТЕБЕ прилика, ќе поставиме нова.
Ај ќе почнеме да ја викаме пореметување на недостаток на морална-одговорност или на странциски боље звучи: Lack of moral-responsibility disorder (LMR), јер ТИ СИ ПОСЕБЕН како и приликава, па ќе видиме; Може и до крај на текстов ќе го модифицираме името. Сé
 во ТВОЈА ЧЕСТ височество!
Причинители:
Непознати, со можност за генетско, социјални и финансиско политички тригер фактори.
Симптоми:
Игнорантно однесување, немање чувство на одговорност, неспособност за здраворазумно расудување, незаинтересираност за субјекти кои не се дел од личното его. Неспособност за хумано сочувство. Внатрешен гнев насочен кон субјекти надвор од личниот-универзум, самосожалување, обвинување на другите, потреба за нанесување штета без чувство на одговорност.
(Пара)Третман:
Во недостаток на стручни медицински методи, кои сеуште се во развој, една од препорачаните пара-методи би била самоповредување со гумен чекич (од потешките) 7-8 пати на ден, со прецизно изведени, што е можно посилни удари во главата на пациентот. Се верува дека ваквиот третман ја стимулира работата на центарот за чувство на одговоност сместен во мозочната кора.
Секојдневна поддршка за изведување на само-третманот од  домашните, пријателите, следачите и широките народни маси е круцијална за напредокот на пара-терапијата
Напомена: Гумениот чекич сеуште не е на позитивната листа. Снајдете се.

Според експертски пара-анализи овој феномен покрај луѓето се појавува во истата форма и кај уште еден вид. Гнидите. Со идентични карактеристики и симптоми, манифестирани во паразитскиот дух на нивната природа како: цицање крв без чувство на одговорност, инфериорност кон оштетените субјекти, опсесивна зависност од освоената положба, вложување напор кој е насочен единствено за своја лична цицачка корист, пренесување штетни влијанија во системот за кој е закачена гнидата, а кои можат да резултираат со смрт на недолжен субјект.
Бидејќи гнидите се несвесни паразити, третманот за санирање на овој синдром кај истите, мора да биде потпомогнат од надворешни фактори кои ќе им укажат на штетноста на нивните несвесни постапки и затоа во нивниот случај НЕ може да се употреби терапијата “Гумен Чекич”.
 Помошни алатки за санирање на ова пореметување кај гнидите (како несвесни паразити) се: чешел, оцет, прашок како стимулација за напуштање на оштетената зона и механичко влечење на гнидата надвор од зоната на удобна хибернација, со цел пукање со нокт на бела хартија од страна на избирачот на гнидата.
Според други пара-експертски анализи, постојат и алтернативни специјалисти, таканаречени Гнида-шепкачи или странциски Gnidas-whisperers. Ова е нова, неистражена метода, која има за цел на гнидите со активна вербална комуникација и гестикулативна интеракција да им ги предочи бенифитите од спротивниот начин и достапна можност на лична егзистенција, без насилно цицање крв и штетонст по системот и околните сожители. Овој метод во секојдневието е познат како БидиГнидоПеперутка-метод.
Што следствено ме наведе (како што спомнав на почетокот) покрај стручниот термин,  да изведам општо прифатлив термин за човечкоит синдром, кој слободно можеме да го наречеме Гнида-синдром.
Се надевам мојата опсежна пара-експертиза ќе им помогне на добрите луѓе кои сакаат да помогнат во тешката лична борба со ова нарушување, како и во борбата на многу недолжни гниди кои се борат со сопственото јас во изнаоѓање решенија за нивните несакани состојби.

Кафето ми е готово!
Вашиот термин истече.
За наредна сеанса јавете се на бројот за борба и санација на Gnidas-syndrome на 1-800-ОДИСИ